കൊൽക്കത്ത ഡയറി

അധ്യായം 3 

"യെ നയാ ആദ്മി "

രാജകീയ എൻട്രിക്കു പിന്നാലെ  തോമസിന്റെ അനൗൺസ്മെൻറ്  വന്നു.

"അച്ഛാ..."

ഗേറ്റ് അടച്ചുകൊണ്ടു ഭടൻ  പറഞ്ഞു. ഗേറ്റിലെ മുഴുവൻ  സമയ കാവൽക്കാരൻ.  പേര് ഇന്ദ്ര ബഹദൂർ . ഇവിടത്തെ പേരൊക്കെ ഇജ്ജാതിയാണ്.  കേട്ടാൽ തോന്നും ഗഡി ഏതോ കൊട്ടാരത്തിലെയാണെന്ന്! എന്നാൽ അല്ല! ഗേറ്റിനോട് ചേർന്നുള്ള ഒറ്റമുറിയിലാണ് താമസം. അത്യാവശ്യങ്ങൾക്കു  മാത്രം  തൻ്റെ പഴയ സൈക്കിളെടുത്തു പുറത്തു സവാരി പോകും. ശകടം കമ്പനി വാഹനമാണ്. ആവശ്യം വന്നാൽ നമുക്കും ഉപയോഗിക്കാം.

ഇടതുവശത്തുള്ള ബദാം മരത്തിനപ്പുറത്തെ കമ്പനി ട്രാൻസ്ഫോർമറിന്റെ  അരികു പിടിച്ചു ഒരു പയ്യൻ കടന്നുവന്നു- മുർമുർ!  ജാർഖണ്ഡ് ആണ്  സ്വദേശം. ഒരു  പതിനാറു വയസ്സിൽ  കൂടില്ല;പക്ഷെ  ചോദിച്ചാൽ  അന്നും ഇന്നും പതിനെട്ടെന്നേ  പറയൂ. ഇല്ലെങ്കിൽ ബാലവേല നിയമപ്രകാരം ചെക്കന്റെ  ജോലി തെറിക്കും. ഇട്രാൻസ്ഫോർമേറിനടുത്തുള്ള മുറിയിൽ ആണ് താമസം. വയസ്സൻ ബഹദൂർ പുറത്തുപോയാൽ കമ്പനിയുടെ സെക്യൂരിറ്റി ഇൻ കമാൻഡ്, കിച്ചണിലേക്ക് അവശ്യ വസ്തുക്കൾ വാങ്ങുന്ന പർച്ചെസിങ്ങ് മാനേജർ, അഗ്രികഴ്ച്ചറൽ ഓഫീസർ, അസിസ്റ്റന്റ് ഷെഫ്, തുടങ്ങി,  മുർമുർ  ഉരുളക്കിഴങ്ങു പോലെ സർവ്വവ്യാപിയായി കാണപ്പെട്ടു.

"ഹേ മുർമു...."

തോമസ് നീട്ടി വിളിച്ചു.

"ഹാ ഭയ്യാ.."

മുർമുർ വിനയാന്വിതനായി പറഞ്ഞു.

'ആജ്കൽ യെ തോമസ് ഭായ്  ക്യാ മുസീബത് ലെക്കേ ആ രഹാ ഹൈ '

എന്ന് തലയിൽ മിന്നിയ ഇരുന്നൂറ് വാട്ട് ബൾബ് പതിയെ ഓഫാക്കി ആശാൻ  അന്തപ്പനെ ഗുരുഗുർ കെ ദേഖി. അന്തപ്പൻ തിരിച്ചും ദേഖി. 

വലതുവശത്തു ഷീറ്റു മേഞ്ഞ രണ്ടു നിലകളുള്ള കെട്ടിടം ചൂണ്ടിക്കാണിച്ചു തോമസ് പറഞ്ഞു:

"ഇദ്ദാണ് കമ്പനി."

'അത്ര വൽതൊന്നല്ല' 

അന്തപ്പന്റെ ആത്മഗതം ഫുൾസ്റ്റോപ്പെത്തുന്നതിന്  മുൻപേ തോമസ് ഓവർടേക്ക് ചെയ്തു :

"മെയിൻ ഓഫീസ് കൽക്കട്ടേല .."

ഇടതുവശത്തുള്ള മൂന്നുനില കോൺക്രീറ്റ് കെട്ടിടത്തിൻറെ  താഴത്തെ നിലയിൽ എന്തൊക്കെയോ മെഷീനുകളും അവിടെ പണിയെടുക്കുന്നവരെയും കാണാം . പുറത്തു വെളുത്തു ഉയരമുള്ള, ഓഫിസർ റാങ്കിലുള്ള ഒരു കാരണവർ, സിഗരറ്റ് ഊതിക്കത്തിച്ചു താഴെ എന്തോ തിരയുന്ന പോലെ തോന്നി.

"ഇദ്  CNC സെക്ഷൻ" 

തൊമസിൻ്റെ കമെൻ്റ്രി. പുറത്തു നിന്ന കാരണവർക്ക്  തോമസ് അന്തപ്പനെ പരിചയപ്പെടുത്തി. 

"ഇദ്  സമാജ്‌ദാർ ബാബു. CNC ടെ  ഹെഡ് ആണ് മൂപ്പര് . ക്വൊട്ടേഴ്സിൽ  തന്ന്യാ  താമസം."

സിഗരറ്റു കുറ്റിയെ അർദ്ധപ്രാണനാക്കി തിരച്ചിൽ അവസാനിപ്പിച്ചു  ടിയാൻ അന്തപ്പനെ നോക്കി ചിരിച്ചു.

അന്തപ്പനും തോമസും മേൽപ്പറഞ്ഞ കെട്ടിടത്തിന്റെ അടുത്ത എൻട്രിയിലൂടെ  അകത്തുകയറി. വൺ പിച്ച് ക്രിക്കറ്റ് കളിക്കാൻ മാത്രം നീളമുള്ള ഒരു മുറി. വാടകയ്ക്ക് കൊടുക്കാൻ വച്ചിരിക്കുന്നത് പോലെ സൈക്കിളുകൾ നിറഞ്ഞു   ഇരിക്കുന്നു. ജോലിക്കാർ  മിക്കവരും സൈക്കിളിൽ വരുന്നവരാണ്. വളരെ കുറച്ചുപേർ ബസ്സിനും. മുറി അധ്വാനിക്കുന്ന ജനവിഭാഗത്തിന്റെ ഡ്രസിങ് ആൻഡ് ഡൈനിങ്ങ് ആണ്. 

തൊട്ടടുത്തുള്ള ചെറിയ മുറിയിൽ നിന്ന് ബംഗാളി റേഡിയോയിൽ 'നിങ്ങളാവശ്യപ്പെട്ട ചലച്ചിത്രഗാനങ്ങൾ'   അലമുറയിടുന്നുണ്ട്. പാട്ടു കേട്ട് കൊണ്ട് സവാളയെ വെട്ടിമുറിച്ചുകൊണ്ടിരുന്ന  കശ്മലനെ തോമസ് അതിൽ നിന്നും താത്കാലികമായി പിന്തിരിപ്പിച്ചു. കലിപ്പ് തീരാത്തതിനാൽ ആയുധം താഴെ വയ്ക്കാതെ മിസ്റ്റർ ബട്ലർ  തിരിഞ്ഞു നിന്നു.

"ഭയ്യാ  യെഹ്  ഹമാരാ നയാ ആദ്മി ഹേ"

 ഇടിവള കയറ്റി വച്ച്, കറ പിടിച്ച പല്ലുകാട്ടി ടിയാൻ നിഷ്ക്കളങ്കമായി ചിരിച്ചു.  പേര് ബിജയ് ബഹദൂർ . ബംഗാളിൽ 'വ' 'ബ' എന്നീ ശബ്ദങ്ങൾ തിരിഞ്ഞും മറിഞ്ഞുമാണ് ഉപയോഗിക്കുന്നത്. സംശയിക്കണ്ട, ഗേറ്റിലെ ബഹദൂറിന്റെ ആരുമല്ല. നേപ്പാളിയാണ്. തടിച്ചു വെളുത്ത പ്രകൃതം. ക്ലീൻ ഷേവ് ചെയ്തു ചുവന്നു തുടുത്ത  മുഖം. (ഈ ക്ലീൻ ഷേവിൻറെ  രഹസ്യം അന്തപ്പൻ  പിന്നീട് വെളിപ്പെടുത്തുന്നതായിരിക്കും.) ചമ്മിയ പോലുള്ള കണ്ണുകൾ. എപ്പോഴും പുഞ്ചിരിക്കുന്ന മുഖം. കിച്ചനോട് ചേർന്നുള്ള ചെറിയ മുറിയാണ്  നളന്റെ കിടപ്പാടം. 

"നെനക്ക് എത്ര ചപ്പാത്തി വേണം?" 

അതിനിടയ്ക്ക് തോമസ് പുട്ടുകച്ചവടം നടത്തി.

"രണ്ട്!"  

"ഉസ്‌കോ ദോ റൊട്ടി ചാഹിയേ "

തോമസ് ഓർഡർ കൊടുത്തു .

"അ ..അച്ഛാ ..ടിക് ഹേ .." 

എന്തോ ആലോചിച്ച പോലായിരുന്നു മറുപടി.സവാളയുടെ 'കണ്ണീർ' ഇനിയും തോർന്നിട്ടില്ലായിരുന്നു.

"ഇന്ന് ചിക്കനാ" 

സ്റ്റെപ്പ് കയറുന്നതിനിടെ തോമസിന്റെ മുഖത്തെ പ്രകാശം അന്തപ്പന് പുറകിൽ നിന്നു പോലും  കാണാമായിരുന്നു. 

കയറി ചെന്ന മുറി ഡൈനിങ്ങ് റൂം ആയിരുന്നു. നീളമുള്ള ഒരു മേശ , കസേരകൾ, TV , ഫ്രിഡ്ജ് പിന്നെ അപകർഷതയോടെ  ഒരു മൂലയ്ക്കു മാറി നിൽക്കുന്ന  വാഷിംഗ് ബേസിൻ ഇത്രയുമാണ് അന്തേവാസികൾ. ഡൈനിങ്ങിനോട് ചേർന്ന് രണ്ടു മുറികൾ. 

"നമ്മുടെ മുറി മോളിൽ ആണ്"

വീണ്ടും സ്റ്റെപ്പ് കയറി. അവിടെയും  ഇതുപോലുള്ള തരം  മുറികൾ. നീളൻ മുറിയിൽ പൊടി പിടിച്ചു ഒരു സോഫ കം ബെഡ് ഏകാകിയായി കാണപ്പെട്ടു. രണ്ടാമത്തെ  മുറി കാണിച്ചു തന്നു തോമസ് പറഞ്ഞു:

"ആ മുറീ  കേറിക്കോ. ബാത്രൂം അറ്റാച്ചഡാ . ഞാൻ പഞ്ച് ചെയ്തിട്ട് വരാ. ഒന്ന് സെറ്റിൽ ആവ് "

അന്തപ്പൻ മുറിയിൽ കയറി വാതിൽ അടച്ചു. വലിയ മുറി. കണ്ണടച്ച്  കിടക്കയിൽ ഇരുന്നു. നിശബ്ദം .... കൊൽക്കത്തയിൽ  ഇറങ്ങിയത് മുതലിങ്ങോട്ടുള്ള  കാര്യങ്ങൾ  സെക്കന്റിൽ 26 ഫ്രെയിമിൽ  ഫ്ലാഷ് ബാക്ക് ചെയ്തു. ശേഷം അന്തപ്പൻ ദീഘമായി ഒന്ന് നെടുവീർപ്പെട്ടു: 

"...കൽക്കട്ട...   "

  

(തുടരും)